ബന്ധങ്ങൾ

വടവൃക്ഷം പോലെ പടർന്ന്‌,
വേരുകൾക്കിടയിൽ ഞെരിച്ച്‌,
തണലിൽ മുരടിപ്പിച്ചൊതുക്കി-
തന്നിലേക്ക്‌ തളച്ചിടുന്ന-
ചില ബന്ധങ്ങൾ,

നിറങ്ങളേഴും വിരിയിച്ച്‌,
മോഹക്കാഴ്ച്ചകൾ കാണിച്ച്‌,
മഴവില്ലു പോലെ മായുന്ന-
ചില ബന്ധങ്ങൾ,

കാട്ടിക്കൊതിപ്പിച്ച്‌-
വെറുതേ വിശപ്പുണർത്തി,
മറ്റൊരാൾ നുണയുന്ന -
വർണ്ണ മിഠായി പോലെ-
ചില ബന്ധങ്ങൾ,

പാകമാകാത്തൊരുടുപ്പു പോലെ,
കാണുന്നവരെ ചിരിപ്പിച്ചും,
തുറിച്ചു നോക്കിപ്പിച്ചും,
ഊരിയെറിയാനാവാത്ത-
ചില ബന്ധങ്ങൾ,

കൂട്ടിക്കിഴിക്കുമ്പോൾ
ലാഭം മാത്രം കാണേണ്ട-
കണക്കു പുസ്തകം പോലെ-
ചില ബന്ധങ്ങൾ,

നൂല്‌ പൊട്ടിയ പട്ടം പോലെ,
കയ്യിലെങ്ങും നിൽക്കാതെ,
കാഴ്ച്ചക്കാരിയാക്കുന്ന-
ചില ബന്ധങ്ങൾ,

പക്ഷെ.....
പേരവകാശപ്പെടാനില്ലാത്ത,
പറയാതെയറിയുന്ന,
ഇത്രമേൽ പ്രിയപ്പെട്ട-
ഈ ബന്ധമേതാണ്‌......?